eK! is electronic Kabalen, a web-exclusive Kapampangan journal of ideas

MAPUPUS YA ya pa ing Abril, ya naman ing pandatang ning paka panenayang mumunang uran ning Mayo. Epa naman tutung kelwatan ustung mamandatang na ing mangasikan a duldul at kildap, mamanyulput na la ding payungpayungan awsan dang kuwat. Orening payungpayungan lalsut mu kaibat ning duldul, kildap at uran, manyaman lang ilutong sabo, kabud mu gisa lang bawang.

Atatandanan ku at pauli na gang man ngeni mitmu kaming tanaman anti mo ring sampaloc, kaymito, yangka (langka), chico, talang (mabolo), guayabano, ngungut (coconut), suwa(pomelo), santol, biabas. Alang palya kabukasan mu ning mumunang uran ning Mayo, ugyugan mula ding tanaman, manganakbag na ding saligubang, makanyan mu naman ding salagintu. Akit tala mu naman mamanyulapo ding bato-kabesa, (palpaltuk) sibaung, uwang, lipaktung, kansasamba, at durun. Karening mesambit, ding sibaung at saligubang ing milulutu. Pakapabukalan la king aslam sasa, dinikdik bawang. Penandit king mamala na ing singkapan adwa ing malyaring gawan: Muna ing tugtugan lang taba at pisangle sangle king buri mung nyaman o kaya manggisa kang tidtad kamatis at karin mula ibulug ding piskad a sibaung o saligubang.

Gang man aku eku pa tikman, ing a kamulatan ku karing kasamak king baryo anyang mangalati kaming pasimundut banda Caut, Magunting, Sta Monica, La Paz, Lomboy, Sto. Rosario potang panaun na ning pamamupul ding durun karing marangle titipunan la murin at malyari lang gawan ulam (o ngeni kaya etamu mu mapeste king pesticide, Abe ko?). Ding durun adwa la uri ing amanwan da king amanung English (Locust – light brown to brown in color) o detang durun a berde na meturing (grasshopper). Iti naman malyaring king marangle pa, gawa kang tumpuk-dutung, magpabaya at makapagnangnang nakang berdeng durun (aro koya, ana pin Ingkong Dama na tunggal yata dangkal kaba balugbug at yang ikit kung matua aldukan ne ing kadidkid a kape meniubat king pugun at likas ne sartin, sabe alduk! Ot eya makikintal?! Ikwa ng mete eke akutnan uli na ning lawe ku kanita sing katas yang kapre king kadagul). Nung dakal no man ding atipun, tang karas bale, simen la galame at lako ya itang bala mu silu keng batal, at pakpak, pabukal la king bulung sampaloc, potang kaybat ikid yu nala at gisa yu la king bawang at taba. Potang apalangi at malutung lutong la – (ana abe ko mangayat naka wawa kanyan!), Gawa na kang tiltilan aslam o kaya tidtad kamatis at putat mangga . (Saben meng gulyak– mangan tana pu– nyaman na!).

Pamu, abe kung mamasa, ituknang ke pa ini at atin ku pang kamarung pakapaskad. Disnan naku ning danup (ing tutu na tako mata merirya ku king penyulat ku). Manggisa ku pa bang atin kung pamulutan kekaban ning patik-patik ing uran ating kung gigutgigutan kamarung manyaman.

WHAT THEY SAY...

Ral David (of USA) writes...

You are a good writer, Cecile, making my mouth water as I read your opening para about "sibaung," those ugly black "critters" that crawled out all over one's little hands as we roamed around a fresh tilled field being prepared for planting. Somehow the way you cooked them— in garlic and local vinegar— made them more palatable than they really are...yeaaaachhhhh!

In Bangkok they sell them by the baskets, arranged like little hills, reeking of oil and garlic. I tried many times to eat them, one little bite at a time, still my stomach and aesophagus refuse to open up... MORE YEAAAACHHHH...

But I am writing this comment to let you know that though I detest these creatures, your article in Kapampangan made them look more delectable than they really are!

All the best... in your teaching and writing!

-Posted/Via Email: Sun, 23 Sep 2007 07:15:27 -0700



The author Cecile S Yumul replies...

Thank you Ral. Dakal a dakal salamat gang mangapa yeeaaaach ka, dagdagan tepa abe ko.

Uli na ning sinulat mu, obat lalu ku pang aganaka ing aliwa tamung kakanan keni labuad Kapampangan.

Ing tutu na dakal pa kalumon kakanan itang Kapampangan na maski karen aliwa tang ka Pilipinu, makasulasuk kanu ing bau o itsura.

Pangutang ta pa wari ing burung asan at balo-balo? Ding mangatua, atin la kasing kasebian, na pakasiguraduan ing gagawa at tatalan king miyayandang buru e bubuluk telan. Nung ali maglipat baryu ing singo na ning buru potang migisa na. Emu agyung sabyan king amanu ing bagsik ning bau ustung ing ginawa, bubuluk ya telan.

Since I have been brought up in a very old traditional Kapampangan household, food preparation and cooking is a major activity daily.To date, many of the tapayans used to store in the buru are still around but echoes with emptiness since the old folks have gone to life beyond.

Minsan akakwa ku pang magpusung— "obat naman pu kulang namu kinwa yu lang bultu (wholesale) ding dara at bapa ku, eyunake man bagya't bagyatan, tiktak la wari karakal ding linipat king labuad yu at dakal la ring maglutung kailangan yu?" Panayan ku namu tundunan naku ning Apung Ginu at ating boses sumabi, "Anta atin waring mamangan keti banwa?" At makibat naku man: "Eku pu balu eku pa miras banwa at ustu nala pa pu ring kinwa yung kamag anak mi misusumagid partidu. Eyu ku pa yayabe, dakal ku pa pagaralan lulutu."

It is in this bustling Kapampangan household where the crawling malating ema (talangka, brother, talangka, the more na matuling, mas niniaman la laman), lalu na ngening kauran, metung la pang pampangan Kapampangan na abangnan, uling kabang mabie la pa, buburan dalang asin at takpan ing lulanan, kabukasan mu, malyari muna lang kanan, ipusit mu ing laman, at pakanapnapan mu itang taba, yambula king bayung tun a nasi at abayan meng tsa o Seven-Up pa ngontrang sakit atiyan, uling sagiwa at king asin la pitda bie ding talangka.

Atin pang metung na daramdaman kung pisasabyan da kanyaman, pero eku naman pengarapan pang takman uli na ning ngening panaun tamu enala tutung marakal at mikasala ka pa king "environment" ustung pignasan mulang kanan, ding mabuktut a berdeng durun. Ara ding makatua, bukaywan do kanu asna la kalutung mamaltuk la uli napin sapak lang puga atiyan potang langutan dala.

Pasibayu, salamat, at king pampanyulat mu man, mididinan bie ing at mislag pasibayu ing miyaliwang pampangan Kapamangan.

-Posted/Via Email: Tue, 2 Oct 2007 02:06:57 -0700



Publish your comments...