(in praise to kahlil gibran)Itamung pengari sana pin tanggapan
ing matning katutwan a makakalingwan
na ring anak tamu ali tala anak
nune anak nala ning Indung panawun
kabaldugan ning b'ye payntunan pakrasnan.
Ding kekatang anak na kayabe bale
e mangayintuliran tunggen talang bandi
nune ibulus la king dayat na ning biye
gulis ning palad da e tamu sakmalan
anting kasangkapan pagkaymut sisimpan.
Itamung pengari ibye tamung lubus
karing sapni tamu lugud a tibubus
e tamu pamintu kekatang kaburyan
o panusig kaya ing kapilubluban
uling atin lang sariling kayisipan.
Pabustan mung ding anak apusan tala
aliwa ilang makyapus karing tata
uling ing b'ye e ya susulung payatras
e ya paynawa't tutuknang keng milabas
makalingun ya king panyatang ning bukas.
Makagyung isalilung lalam t'mung bagyus
aplusan lang lugud idayu keng signus
karelang ambisyun e tamu saklawan
uling angga king pekamarayung paninap
ela atagkil k'relang kaladwang malyap.
