BINUGA RENG sapin ing Pangulu ning Pekamasikan Bansa king Yatu, ing pamuntuk ming George W. Bush.
Ngara Paya
Mangapagulisak la ding menakit karing sine na aptas. Aru, ngana ning metung magi yang bayani yang memugang ayan karing kalayi na. Aru, kamal da kanyan deng sapin aren. Ah, mikutang ya kanyan keng "Jeopardy!" yan. Ya na pin man, apulu nala kanung milyun dolaris halaga ngeni detang pemuga rang sapatus areta. Peganaka na ning metung, "Oy, Presidenti taya yan." Wa pen ne, nung ketang napun nakadwana, ing milyaring ini pagmulan nana ning Gera o Pamiabnu. Dapot, aliwa ya ing kwentung ayni. Milyari pin ini pauli ning pamaglusub king bansa ning memuga. Oyta ing pangunakan ning memuga, patye kanu e re binulus ing kilung dang bapa nang memuga kang Pangulung Bush, ibuga nala detang tatalnan nang misanggang sapin a maragul pa kaya.
Karin Bansang Tibwan, gagaga nala naman, managkas nala ding sadyang e bubulad a senador. Dapot neng politiku ya't binang atinan, e la makapanwala ding dakal a balu na pin ing salat na ning Gabun Tibwan. Malyari ya kayang maglako sapin bitis mirinan balas a e sakit?
Arapat Na Pang PGMA
Mamako nala, ding aliwa asnanala karakal atawad king pamanungkulan da gagawa la pa kanung paralan ba nalang e mako. Tatakut lang mamakibatan karing sasabyan dang depat a kasalanan king ketawan. Neng ini kanu ali rana apangilagan pangalako ra katungkulan. Makalunus nala man, kilung at sinukul da ing sarili ra? Ning mitali o misila karela? Angga na kanyan king mayala la biye tatakut nalang tatakut pati king alino ra? Map dang gawan din saguli nang mako king sikanan ya pin ing ibulus da't patimawan ing karelang sarili king megewa rang kulungan. Libad-libad la, manintun, gagawang kakaluguran sagip karela? Manintun pipagbakwitan anting kapagsadyan karing e asabat a kapalyaryan? I Gloria Macapagal Arroyo nung tune reng kaluguran ding makapadurut kaya, sukat deng saupan misubli king sadya nang kabandyan ning Balayan. Sukat deng abayan maglarin karing mengasira, manulid karing mengabukut. Manulu karing menasakit. Manayus karing megulung belwan, mengayalwang katutwan at kabyasnan.
Ulaga ning Pamagaral king Yatu
Samasan ing pamanuru karing pipagaralan, pauli ning patye e mausta ampon e tutu ing laman da ding aklat, miras karing apu king tud at pati kuku ing maling belwan. E na kalupa ning manulu o doktor ing mali na anga mu kutkutan mete o cementeriu ing karasan. E na kalupa ning mali ning abugadu, miras mu king sukulan ing keyang mali. Ing mali ning pipagaralan miras karing daratang lipi. Bayu la mako sana samasan la ding libru. Bankanita alang mamuga karela. Paruminggu bayu ya mebaronggang sapin ing Pamuntuk keni Amerika at adwa pa kanung banwa bayu ya mako ing ken Indung Balayan migunamgunam ku't isipan nung nang sukat iyablas king pamaglukluk da. King pangabaldug ning pamangabyayan at pangapupud ding bangku, dakal lang tau ding mekaramdam kanini:
Nang Agawa King Lipunan
PAMAGLAKO
[Misulat 8 Ning Disyembri, 2008]
Wa mako naka dapot nanu ing lakwan mu?
Danup, lipit, gulu't kasakitan.
Pautangan mu ke pang lub
Papalto ka pang mayap
Anting mibatang bayani
Mangaintulid galal.
Karing kabalen tamung mangatenakan susulat karing pipasyagan/dyariu masikan lang manapse payabut ampon kabyasnan karing Filipinu. Antimo ri Professor Randy David, Pekamatas Ukum Artemio Panganiban, Professor Ambeth Ocampo, Juan Mercado, kayabe ning anti nang Kapampangan Rose Beatrix Cruz Angeles, Jose Montelibano ampo ding kayabe nang Pun Lalawigan Amung Ed Panlilio king Kaya Natin!. Mamasala dang maralas ing ulaga da ding pibalebale, pisamban, ampon pipagaralan king pamanugis dang ugali ding memalayan. King dayat ning kawatasan ing meging Pamuntuk ning United Poet Laureate International, Ben Yuzon, anak ning Meangubiye Poeta Laureado Amado Yuzon, pane nang titimid king ing pake ning kawatasan ya pin kabud ing kapayapan. Manwala kung metung mu ing lalakaran at nasang lakwan da ngan reni. Ya pin ing Ethical Society o Community, at kanini ding atlung telakaran a simbitla ku, (home, church, and school) atin lang kapat a tatalangan ampon masikan pakyapusan/influence. Ini ya pin ing MEDIA. Manwala ku king ing MEDIA sukat yang mirinan dakal a pansin ampon pamagbante't pamanayus. Karing sine, aptas/internet, radyu, t.v., komiks, pipasyagan, patalastas da ding billboards, dalit, terak, pamanyalita da ding politiku. Nanung ararapat da karing atlung pekamumunang telakaran/basic units of society den? Nanu ya ing abuu rang Balayan? Malyari ne kayang iyabe ing MEDIA karing Basic Units of Society?
Patutuan Taya Ing Pasku
Mag-Pasku na, nanu ya ing Pasku? Panintunan miya kayabe ko ding tubu/apu kung dakal na. Minta ke kening lugal ausan dang "Christmas in the Park". Pipasyalan da ding anak. Makatipun la ding dakal Christmas Trees gewa ring myayalwang aguman kalupa ding Boys Scouts at aliwa pa. Kareni makasabit ding dakal a payabut/messages.
Atin pin Pasko. Tutu ya ing Pasku, neng panaun na atiyu la pa't makalto ding mangasalang batwin ampon planeta babo. Ya mu ing ali malyaring mako. Bayu ing kekatang Pamaglako matna tamu ngan babo, karin akit taya ing kekatang kababan.
PASKU KING PIPASYALAN
[Christmas In The San Jose Park]
Memanyumputan sulu
dapot mangalati lamu
Marakal tigtigan
dapot mangayna mu
Paramdam da'ng Pasku
karing mangalating tau.
Minatna ku banwa
ikit ke ing bulan
kapat ya'ng dake
Dapot isanu itang–
Maragul mabilug
sidsad ya king lare
kasiping ning
maputi malabulak a bulan–
Orasan ne pala
Balayan nang San Jose
Paganaka ne'ng Batwin na ning Belen!
