eK! is electronic Kabalen (eksite.com), a web-exclusive Kapampangan journal of ideas

abel d soto
Caring aldo milabasan,
Ing sarili cu cucutnan:
"Caring miyayaliuang labanan,
miral pa caya ing capayapan?"

E cu balu nung nanung sangcan,
tutu na cung caguguluan,
milalaco cu sicanan,
mababauas cu capanayan.

O baquet maliliari ngan iti?
Micucutcut cu caring mangapaliari:
miyayaliuang cagutgutan
qng balen tamung pacamalan.

Nu' me caya acquit ing catutuan
quening yatung pulus calaraman?
Atin pa cayang paintungulan
nung qng Dios lalaut tamu ngan?

Nun inia sa't maralas cung cucutang,
qng sarili cu pigugunaman:
"Sumangid na ning sablang ini,
nucarin ya caya ing Dios queni?"

Dapot aganaca cu iti nang catutuan:
Qng Dios, alang mipara cabiasnan;
at careti nang anggang capaliarian,
ing Dios, capilanman man, e na ca tamu betingan.


[About the author. Ing sinulat caniting poesia metung ya caring apu ng Juan Crisostomo "Crissot" C. Soto at miembru ne ning Sapni Ng Crissot Literary and Cultural Foundation. Taga-Sta. Ines, Bacolor ya at atlumpulu't lima neng banua edad. Quinangwa yang one-year certificatory double-major course qng Creative Writing at Performing Arts qng Center for Arts Foundation, Inc. at casalucuya' nang paninapan ing aquit neng pasibayu qng entablado ing metung caring peca-sicat a sarzuela nang "Crissot," ing "Alang Dios!"]

-Posted: 7:01 PM 10/27/08 | More of this author on eK!
Nextnext