SIGURADU MU mamagkumpul la reng tau kareng kapilya, pisamban at kareng lugar a "Pabasa." Makapangilabut ing swala da reng mangatwang babaying pakabelu, gegegeng pagulisak a magkanta.
"Enuma neng Udas e Esus..." "Anyang pinaku de keng kurus..."
Makapangaklak ing balbal a bosis lulwal kareng speaker a trompa. Ing tarling ning gitarang makalawang a string, kabang pangalbitan dala reng bayintau, makasora at balamu eka maybug malaso pengan kaybat ning apunan.
Pakanamber tu (2) la mu rin siguradu reng electric fan kareng bale-bale.
Keng sobrang datang ning lisangan kanyan keng Malyaldo, e pweding ela gawang pakaplastik a yelu reng tau. Pustahan tamu, mag-stock lang dakal a Kok (Coke) deng keng taga-Villa Teresa at deng keng taga-Sapalibutad. Siguradu mu, atsu no keng kantu at mag-aluwalu (halo-halo) kaybat dang mengan.
Eno man makipag-Pasyun deng keng subdivision. Babalak nalang munta Baguio o mag-beach den. Patentadu ing barbekyu. Magpindang la? Ali siguru, mapang Spam ampong Del Monting ketsup. O ebun buru? Ali mu rin, magbakal lang toyung Kikoman ampo wasabe. Karin la saling asan danum. Syempre yellow fin tuna ing i-sashimi da.
O reng keng baryu, na'ng bakalan da? Aru Dyos ko, patentadu ing buru ampo itu, mustasa ampo lungganisa. O ing asan danum? O nanu pa ikilo da? Tulingan (ya pin ring yellow fin tuna reta, susyal mu ing aus) ing i-sashimi keng aslam, sibuyas, kalamunding ampo lara.
Adobung babi ing patentadu karing taga-baryu (e 'gad kasi masira). Cassava cake ing pagmayumu.
Beef estufadu naman ing kareng taga-Village (e rin magsebu, uling mapali ing panaun.) Sansrival ing dessert.
Deng taga-baryu, keng dagat la pa manos gamat kaybat dang memag-inum pamilisais (family size) RC cola. Aruuu... sauglulu da la pang pagulung deng anak deng interior parugang para salbabida. Oyta, i Jun-Jun mesugat ya pa atyan ketang makausling bakal a pipagbomban ning interior.
Deng taga-Village naman, paka-isnorkel la pinulandit deng anak da. Tatagal la reng maid. Ing metung a maid, atin ya pang nasi asbuk, ena ikwang ayari ing kakanan na uli da reng sese nang sinugud danum.
Paka-syorpans (short-pants) lang pagaral reng keng taga-baryu, at deng keng taga-Village paka-trunks lang bulaklakin anyang mag-swimming. Kiskasan do pang sunblock lotion ding anak taga-Village, at reng taga baryu... tigtugan dalang marimlang danum miki yelu ('bat karetang basu da reng bapa rang mag-shot Emperador) reng anak da, para e la kanu mikapaling ustu. Mengaligkig la pamo keng dimla reng anak, ehhhh!
L'en mu pin naman, ne? Ing biye, ne? Pota balayu miyabe la kareng makahilerang cottage deng taga-Village ampo baryu. Ali, aaaah! Linabas lamu reng taga-Village karetang makatabing a "kubu-kubung" cottage. 'Bat la gulut reng taga-Village ketang... Otel (Hotel)!
Kaybat dang mindilu, mengan lang tidtad ampo tinape reng taga baryu. Mangaga ya pa i Jun-Jun, inum ne kanung koya na ing kayang Pop (Pop-Cola)!
Mibalik la Otel deng taga-Village at menorder lang amburger (hamburger) ampo prentsprice (french fries) atsaka batamles (bottomless) aystee (four seasons iced tea).
Mag-ala-singku na anyang mako no reng taga-baryu. Mamasa la pa kanung Pasyun deng mi-dara, at deng mi-bapa. Atin magsalibatbat ampo magdarame. Deng anak a mangalati memanudtud la kareng pwad da reng bapa ampo dara ra.
Deng taga-Village, menalbe la pang kiddie show with clowns keng Otel, kabang pakasakbit la reng PSP da kareng batal da.
Malapit ne ing Malyaldo, magdarame, Pasyun, ampo palaspas...
I darang Baby pala, magtinda yang Redhorse ampo BBQ keng puni. Papagtindan ne i Shiela, pawnakan ne, 18 anyus, malagu, mituknang pamagaral Systems Plus.
Patse alas-tres, maglungkut-lungkut na la reng tau uling mepaku ne ing Kristu.
Publish your comments...
