BAWAL KANU ing mamyalung anggang alas sais ning bengi. Maglakad ya kanu i Mama Mary. Kaya oyta,
pulayan kaming memanuli---tiknang mi pa ing pamamyalung tambaks, maro, ampong tsaynis garter. Reng
pisan kung babayi, mengagunut la kang dara kung Baby. Ikaming lalaki, mengasaplid kami kareng istepin
ng ingkung ku.
Disan mi lang makasiklod di apu, paka belu la pa at makatanud la keng istatwa ng Mama Mary---makabalut ya pang plastic angang pingas-pingas ne itang metung ng bitis. Mamau la reng sampaguita ampo ilang-ilang a melangi, misasamut keng bau ning asuk ning kandilang kule yellow.
Mamau kaming pawas reng kapatad ampong pisan ku. Ing bolang a Yen-Yen (pisan ku), gigigit yang gigigit. Kaba kasing makapyak lang mangadi ring dara ampong apu ku, labul-labulan ne ing kandila kareng arap da reng mangadi. Oyta, loko, mekandut ya! "Bapu Marya, mipmu ka keng grasya" Alti ka, patugutan mu yan!" anang apu ku, sabe neng kindut ing pisan ku kabang makapyak yang tuluy-tuluy mangadi.
Ikami tuluy ing ginigit, linawe langan sabe-sabe binalikid mangarok mata kekami reng mangatwa. Atatandanan ku la pin angga ngeni, lupa lang ngan "horror" uling paka-brown la malan ampo pakabelu mitatakpan kapit na ning karelang lupa.
Map namu meyari na. "Mi…amen," ami ngan. Ita mu ing atatandanan ku ketang pangadi. Potang payari ne ing pangadi, pakasikan mi ing "Mi…AMEN!" Balak mi sang lumwal pasibayu para magtambubung, oneng sebat na kaming ingkung ku at mangan na kami kanu---nung ali, e kami maka-panalbe Combat ampo Rat Patrol.
Sinduk ng apu ku ing sabo maligosu, atin kamuti ampo binudbud tinapa. Ing panayan mi ing adobung babi, oneng kulang pa kanu pangalangi. Milup ke pa kanung sabo. Muna na ke kanu a da reng dara ku at tuluy de ing binggo---"Under O... sipsipan lang baligtaran!" I ingkung ku naman atsu ketang lamesa na, pakapagaralan ne itang salida bola na keng weting. Pati ing lumang dyaryu pakabasa ne, nung nang linwal keng syupisteyk.
Otya, ambula na kaming ambula angang mapali pa ing nasi (maggamat ke ngan). Pero tikman mi rin ing gatas tigri---marimlang nasing dinyan danum ampong tsa tunggalan kaming tuyu. Dyan mi rin kanitang asin ing marimlang nasi. Ring wali ku kanita, kaybat dang mengan, tatakla la keng paligi, kakalwan da ing salol da at makatiro la buldit. Marine la pa reng alti, ede buri pabusni ing sulu keng kusina. Keng kabolangan da, awsen de pa e Brownie (asu mi, anggang kule yang black) para dilat-dilatan na ing dinat da. Asno kabolangan talaga, kaybat gigigit no na naman.
Ing ingkung ku kanita ing mapamulyo. Angang atin kaming T.V. (Zenith) keng keng lual bale manalbe, makasilip keng awang maka-screen (Combat ya kanita ing palage). Reng tineydyer kanita makipanalbe la, panyagapan da la reng anak mangasiglang manalbe. "Kong, lipat ye pa pu keng basketbol. YCO-Crispa ing laban," ada. Magbusit ke kanita uling buri mi Combat. Potang masyadu na kaming masigla, paspas nong ingkung ku reng tsinelas na keng sreen. Sapak ke kanitang alikabuk lupa!
Atin nang mamaung pawas, paksi---malanam ke ngan bau. Atin munaman mangunyud!
Potang pauli na atin nang mangaga. Mewala la istepin. Ing bolang a Ronald "kamantigi" ing mapanyalikut istepin.
O sige, abe, ne. Itutuloy--
Publish your comments...
