ANO NGA ba ang masasabi kong maganda tungkol sa ating mahal na Bayan habang nasa gitna tayo ng mga
sumasabog na mga gusali at kumakalat na suhol?
Sa dinami-dami ng mga bansa sa ating planeta hindi lang ang Pilipinas ang kawawa. Halos lahat ay may problema sa korupsyon, mga natural na sakuna, pagbobomba, at kung anu-ano pa.
Ang problema natin ay nakapokus ang ating mga tenga at mata sa mga bagay na walang kakwenta-kwenta. Sa dinami-dami nating dapat mapansin yung masasama pa ang lagi nating binabasa o nababasa.
Ika nga, mukhang kulang ang araw natin kung hindi tayo nakabasa ng rape, holdup, pagsabog, patayan, nakawan, at kung anu-ano pang karumaldumal na mga pangyayari.
Kung sa bagay, sino nga naman ang magbabasa ng puro positibo ang sinasabi sa dyaryo? Sa tinagal-tagal na ng panahon, ang ating mga kaisipan ay nasanay na sa pagbasa ng puro negatibo. Subukan nga kaya nating palitan ito at para makundisyon ang ating mga utak sa mga positibong bagay naman.
Eto ang mga nakita at mga narinig ko sa TV at radio na hindi ko makalimutan---kaso nga lang di ko na matandaan ang mga detalye, pero alam kong nababalitaan ninyo rin ang mga ito.
Mga kagitingan ng mga ordinaryong Pinoy:
"Isang pedicab driver ang nagsauli ng mahigit na P500,000 sa isang ale na may pwesto ng babuyan sa palengke."
"Isang batang lalake na may 10-taong gulang ang nagligtas sa kanyang 4 na mga nakakabatang kaptid habang tinutupok ng apoy ang kanilang bahay."
"Isang pulis ng Pasig ang nakahuli sa mga snatcher na nagtangkang mag-holdup sa isang pampasaherong jeep."
"Isang taxi driver ng NAIA ang nagsauli ng isang pitaka na naglalaman ng $2500 sa isang turistang Koreano nang naiwan nito sa kanyang taxi."
"Isang sarhento ng Marines ang nag-alay ng buhay upang mailigtas ang isang ale na nakulong sa isang mausok na kwarto ng sumabog na Super Ferry."
"Isang conductor ng bus ang matapang na tumulong sa isang nagliliyab na sasakyan sa kalagitnaan ng EDSA; nasunog man ang kanyang kaliwang kamay, nahila pa rin niyang palabas ang walang malay na driver nito."
Di ba ang mga ito ay laman din ng balita? Gawa kaya tayo ng dyaryo na may pangalang "Dyaryo Positibo"? Ang dami nating mga pwedeng isulat, dahil ang Pinoy ay likas na bayani. Di ba ilang milyun na ang Pinoy sa ibang bansa na naghihikahos pero masipag pa rin na naninilbihan para sa kanilang pamilya at ating bayan?
Sino ba ang dagliang tumutulong sa mga sitwasyon kapag may sakuna? Di ba mga ordinaryong Pinoy na kadalasan ay kalat-kalat lamang sa kalsada, dahil di lahat ng tambay ay tarantado. Marami sa kanila ang may mabuting asal at may kakayahan, at ang iba ay nakapag-aral at naghihintay lang ng pagkakataon upang makapagtrabaho.
Tulad din ng mga Pinoy na nakakalat ngayon sa buong mundo, di ba marami ring Indiano, Koreano, Intsik, Amerikano, Hapon, Arabo, Aleman, Ruso, atbp., na nag-nenegosyo at nagtatrabaho sa ating bayan?
Di ba sa America, Europe, at Asia ay may mga magnanakaw din? Di ba sa Middle East ay marami ding rape? Pati nga mga tupa at lalaki tinitira nila. Sa America, di ba may mga pagsabog din, tulad sa Thailand at Indonesia na kung saan din ang iilang resort at hotel ang sumabog? Di ba katatapos lang ng giyera sa mga Balkan States ng Russia? Di ba sa Europe ay napinsala din ng isang pagbobomba ang trambya nila?
Kaya di lang sa atin ang may problema, lahat ng mga bansa ay may kanya-kanyang problema. Mas masahol pa ang kagutuman sa Africa kaysa sa Samar, Negros, at Manila, di ba?
Kaya ano pa ang kinaiinis natin sa mahal nating Pilipinas? Parang sinasabi natin na layasan natin ang ating pamilya o di kaya ikahiya natin dahil may problema kay Itay na lasenggo, kay Kuya na tambay, kay Ate na nabuntis kaagad, at kay Junior na nalulung sa droga. Di ba halos lahat ng pamilyang Pilipino ay dumanas o dumaranas ng ganitong mga problema?
May solusyon ang lahat ng iyan, kapatid. Sino namang bansa o pamilya ang walang problema? Lalayasin o ikahihiya mo rin ba sila at ang iyong bayan?
Para sa akin, dapat dagdagan ang pag-"smile" natin, dahil gaya ng sinabi ko kanina, ang lahi nating mga Pinoy ay matatapang at maharlika. Kahit anong problema, makakaahon at mapapagtagumpayan din. Kahit lang sa boksing at kantahan ay World Champion tayo---ok na yun.
Panimula lang muna yun. Alam ko darating ang panahon na matutupad ko ang pangarap kong maging isang astronaut; kapag makatapos sa high school si Pareng Manny, gusto niyang maging pilot; at si Ara naman, kung makatapos ng college, gusto niyang maging orchestra conductor...
O siya, eto na naman po uli si Pepot, nagdadasal, nangagnarap, at sumasampalataya sa kapwa Pinoy. Sabi nga ni Bro. Mike, Bro. Ely, Bro. Bo, Ka Manalo, at Bro. Louie-Louie: Lahat ng ito ay matutupad! Basta sama-samang nakatawa.
Publish your comments...
